Төрсөн ах дүүс олон жилийн дараа

Нэг л эцгийн ариун урсгалаас үе залгаж ургасан болохоор

Нэг л ээжийн алтан хэвлийд үр нь болж бүрэлдсэн болохоор

Нэг л гэрийн халуун голомтыг тойрч хөлд орсон болохоор

Нэг л нэрийг хан хорвоод залж овоглосон болохоор

Зүс царай адил гэж андуурагдсан болохоор

Зан ааш ижил гэж эндүүрэгдсэн болохоор

Зөрүүд тэнэгхэн наснаасаа л сайдаж муудаж өссөн болохоор

Зүйргүй гомдлоо гэвч нулимсаа арчаад л инээдэг болохоор

Өлсөхийн цагт хэдхэн боорцогоо хувааж идсэн юм болохоор

Өвдөхийн цагт халуун сэтгэлээ дэвсэж тойглосон юм болохоор

Өнчрөл хагацлын дунд биесээ л түшиж үлдэх юм болохоор

Өөдөсхөн багаасаа л нэгнээ бараадаж ижилдсэн юм болохоор

Агаа нь дүүгээ өмөөрч айлын бандитай нудрага зөрүүлсэн юм болохоор

Аниа нь багыгаа тэвэрч сайртай хацрыг нь үнсэж эрхлүүлсэн юм болохоор

Тоостой нүүрээ угаацгаан баярын дэнжээр гүйсэн юм болохоор

Тоонотой гэрээ дүүргэн зөнгөөрөө шуугилдаж жаргасан юм болохоор

Нэг л хүний тэргүүн дээр цуглаж уйлах юм болохоор

Нэхэл хатуу орчлонг хамтдаа туулах юм болохоор

Үес үесхэн бодоод л үгүйлж санадаг юм болохоор

Үсэн буурал боллоо ч ах минь дүү минь гэдэг юм болохоор

Салаад явъя гэвч сэтгэл нь урсаж холбох

Сарниад одъё гэвч голомт нь дуудаж цуглуулах аргамжаатай улсаа бид…

Эх сурвалж: С.Отгонтуяагийн шүлэг